East Tuipui bialtu MLA Pu Ramthanmawia chuan vawiin khan Khuangleng Community Hall-ah Mizoram Cooperative Apex Bank, Khualeng Branch a hawng.

MLA Pu Ramthanmawia chuan a bial chhunga Mizoram Cooperative Apex Bank hawn a nih chu lawmawm a tih thu sawiin Khuangleng leh a chhehvel khuate tan malsawmna rahbi thar a thleng chu ropui a tih thu a sawi a. Bank hawn a nih theihna tura tha thawhtu zawng zawngte chungah lawmthu a sawi a ni. MLA chuan Mizoram Cooperative Apex Bank atangin state pawnah pawisa a luang chhuak ve lo a, Zaa za Mizote ta a nih avangin Mizote’n ngaihhlut a tul thu sawiin Bank hmang thiam apiangte’n a tangkai zia an hria a, amah ngei pawhin a lo hman țangkai tawh thu a sawi a, Apex Bank Branch hawn thar tak chu a nihna ang taka hmang tangkai thiam turin mipuite a chah. Kut hnathawktute chu an thlai thar an hralhna sum te leh an pawisa neih ang angte peipunga dah lut thin turin a chah bawk a ni.

Chief Manager Pu Lalbiakdika chuan report pein Champhai District chhunga Khuangleng aia sawrkar hmun pawimawh awmna leh khaw lian zawk khua engemaw zat a awm laia Khuangleng khua Branch awmna atana thlan a nihna chhan chu, East Tuipui biala khaw hrang hrang te kawtchhuah rem ber a nih vang a nih thu a sawi a. Bank hawn theihna tur atan hian May 2025 thla atanga hna thawh tan niin Cheng Nuai 17 sen a nih thu a sawi bawk.

Branch hawnna inkhawmah hian Pu Lalnunsanga, Chairman MCAB-in a kaihruai a, Pu Lalbiakdika, Chief Manager (Adm.Dept); Pi Lalhmachhuani, DDM NABARD; Pu Kapsailova, VC Vice President, Khuangleng; Pu B. Lalchhanhima, DCO, Champhai leh Pu Lalrinchhana, Vice Chairman MCAB-te’n thu an sawi ve bawk a ni.

Vawiina hawn tak Khuangleng Branch hi Mizoram Cooperative Apex Bank-in Branch 32 an hawnna a ni a, ATM Booth 39 an enkawl mek bawk a ni.